Hindistonda chop etiladigan "Business Central Asia" oylik jurnalining navbatdagi sonida O'zbekistonga bag'ishlangan turkum materiallar e'lon qilindi, deb xabar bermoqda "Dunyo" AA muxbiri.

"Prezident O'zbekistonni rivojlantirish bo'yicha "yo'l xaritasi"ni belgilab berdi" sarlavhali maqolada davlatimiz rahbari Shavkat Mirziyoyevning Oliy Majlis Qonunchilik palatasida bo'lib o'tgan majlisda so'zlagan nutqida ilgari surilgan dolzarb vazifalar mazmun-mohiyati va ahamiyatiga to'xtalib o'tilgan.

"O'zbekiston iqtisodiyoti so'nggi yillarda ikki baravar o'sib, 100 milliard dollarlik marradan oshdi. Aholi jon boshiga daromad 2024-yilda 3 ming dollarga yetishi kutilmoqda. Eksport hajmi qariyb ikki baravar ko'payib, birinchi marta 25 milliard dollardan oshdi, oltin-valyuta zaxiralari esa 40 milliard dollarlik dovonni zabt etdi. Jahon banki 2024-yilda O'zbekiston Yevropa va Markaziy Osiyoda iqtisodiy o'sish sur'atlari eng yuqori bo'lgan uchta davlat qatoridan joy olishini e'tirof etdi", – deb ta'kidlangan maqolada.

Jurnal davlatimiz rahbarining parlament quyi palatasidagi nutqida keltirilgan quyidagi raqamlarga alohida e'tibor qaratgan. "O'zbekiston – 2030" strategiyasida mamlakat yalpi ichki mahsuloti hajmini 160 milliard dollarga yetkazish maqsad qilib qo'yilgan edi. Barcha imkoniyatlar ishga solingani tufayli bu ko'rsatkich joriy yilning o'zida 110 milliard dollarga yetishi kutilmoqda. Shunday sur'at jadal davom ettirilsa, 2030-yilga borib, O'zbekiston iqtisodiyoti hajmini 200 milliard dollarga yetkazish salohiyati mavjud. Bu aholining turmush darajasi va sifatini keskin yaxshilashga asos bo'ladi.

Nashr O'zbekistonda makroiqtisodiy barqarorlikni ta'minlash, kelgusi besh yil davomida iqtisodiy o'sish sur'atlarini 6-7 foiz darajasida ta'minlash, iqtisodiyotda xususiy sektorning ulushini 85 foizga yetkazish, davlat-xususiy sheriklik doirasida yirik loyihalarni amalga oshirish va boshqa dolzarb vazifalar haqida batafsil ma'lumot keltirgan.

"Business Central Asia" O'zbekiston hayotining ijtimoiy-iqtisodiy, madaniy va boshqa jabhalarida amalga oshirilayotgan keng ko'lamli o'zgarishlar jarayoni haqidagi qiziqarli maqolalarni o'z o'quvchilari e'tiboriga havola qilgan.