O'zbekiston elchisi Ashraf Xodjayev Qatar ta'lim va oliy ta'lim vaziri Busaina bint Ali An-Nuaymiy bilan uchrashuv o'tkazdi, xabar qilmoqda "Dunyo" AA muxbiri.

Suhbat davomida Qatar universitetlarida o'zbekistonlik talabalar uchun kvotalar ajratish va ularning sonini ko'paytirish, Qatar va O'zbekiston maktab va oliy ta'lim muassasalari o'rtasida almashinuv, dolzarb yo'nalishlarda qo'shma o'quv dasturlari va ilmiy loyihalar, tadqiqotlar tashkil etish kabi masalalar muhokama qilindi.

Vazir Busaina bint Ali An-Nuaymiy O'zbekiston va Qatar o'rtasida ikki tomonlama do'stona aloqalar mustahkamlanib borayotganidan mamnunligini bildirdi. "Yaqinda Doxadagi Mushayrib madaniy markazida bo'lib o'tgan O'zbekiston hunarmandchiligi ko'rgazmasini shaxsan borib ko'rdim va juda ta'sirlandim. O'zbekistonning tarixiy merosi va jahon sivilizatsiyasiga qo'shgan ulkan hissasi beqiyos va sizlar bundan har qancha faxrlansangiz arziydi", dedi u.

Qatar vaziri, shuningdek, o'rta maktab o'quvchilari o'rtasida o'zaro almashinuvlarni yo'lga qo'yish hamkorlik yo'nalishlaridan biri bo'lishi mumkinligini bildirdi. Qayd etilishicha, Qatar Madaniyat vazirligi bilan hamkorlikda o'tgan aprel oyida qatarlik maktab yoshidagi bolalar jamoasining Toshkent va Samarqandga sayohati uyushtirilgan. Qatar tomoni ushbu loyiha muvaffaqiyatli amalga oshirilganini qayd etish barobarida, uni doimiy va o'zaro tarzda yo'lga qo'yish mumkinligini ma'lum qildi.

Muloqot chog'ida hozirgi kunda dolzarb hisoblanadigan sohalarda qo'shma ilmiy izlanishlar va tadqiqotlar o'tkazish taklifi ham Qatar tomonidan qo'llab-quvvatlandi.

Muzokaralar natijasida O'zbekiston va Ko'rfaz arab mamlakatlari rektorlari forumini o'tkazish tashabbusini o'rganish va ushbu sohaga oid boshqa bir qator loyihalarni amalga oshirish bo'yicha muloqotni davom ettirish to'g'risida kelishib olindi.