Ma’lumki, “Zakovat” – mamlakatimizdagi eng ommaviy intellektual loyihalardan biri sanaladi. Yangi O‘zbekistonda mazkur bilimlar charxlanadigan musobaqa nafaqat respublikamiz, balki qo‘shni mamlakatlardagi yoshlarni ham o‘z safida birlashtirib kelmoqda.

Millatlararo munosabatlar va xorijdagi vatandoshlar masalalari bo‘yicha qo‘mitasi rahbarligidagi O‘zbekiston Respublikasi delegatsiyasining Amerika Qo‘shma Shtatlariga xizmat safari davomida Vashington shahridagi O‘zbekiston elchixonasida vatandoshlar ishtirokida “Zakovat” intellektual bahsi o‘tkazildi. Tadbirda “Zakovat” bahsida “Vashington zehni” (Vashington), “ZiyoArt” (Nyu York), “Yurtdosh” va “Turon” (Filadelfiya), “Uzbek society of America” (Nyu Jersi) kabi jamoalardan iborat 5 ta guruh o‘zaro kuch sinashdi. Jami 100 ga yaqin yurtdoshlar bilim sinovida ishtirok etdi.

Intellektual o‘yin davomida ishtirokchilarning bilim saviyasi, jamoaviy ishlash va mantiqiy fikrlash qobiliyatlari sinovdan o‘tdi.

“Bunday tadbirlar nafaqat vatandoshlarimiz ma’naviy va intellektual salohiyatini yuksaltirishga, balki ularni milliy birdamlik ruhida birlashtirishga xizmat qiladi”, – deya ta’kidladi O‘zbekiston Respublikasi Millatlararo munosabatlar va xorijdagi vatandoshlar qo‘mitasi raisi o‘rinbosari Olim Narzullayev.