Uzbekjournal.uz – Mamlakatimiz hayotiga oid so‘nggi yangiliklarni kuzatib boring

Faxr

By Muxtasar_Qodirova - 28-Avgust, 2025-yil 15:01 493 Koʻrishlar 0 Izoh

Professor Shahid Taslim: Men yoshlarga o'zbek tilidan saboq berayotganimdan faxrlanaman.

Professor Shahid Taslim (Hindiston) O'zbekiston davlat mustaqilligining 34 yilligi munosabati bilan xalqimizga o'zining bayram tabriklarini izhor qildi:

– Men butun o'zbek xalqini, o'zbekistondagi barcha do'stlarimni yaqinlashib kelayotgan Mustaqillik kunining 34 yilligi bilan samimiy tabriklayman.

Dunyodagi murakkab jarayonlarga qaramasdan, 34 yillik davr O'zbekiston uchun taraqqiyot va mustahkamlanish yillari bo'ldi.

Bugungi kunda O'zbekistonda amalga oshirilayotgan yangilanish jarayoni jahon hamjamiyati diqqat e'tiborida turibdi. Mamlakat geografik nuqtai nazardan dunyoning markaziy mintaqalaridan birida joylashgan. Uning faol tashqi siyosati xalqaro maydonda e'tirof etilmoqda va xorij davlatlari bilan serqirra aloqalar mazmunan boyib bormoqda.

Jumladan, Hindiston va O'zbekiston o'rtasidagi munosabatlar ham izchil rivojlanmoqda. Juda ko'p hind kompaniyalari O'zbekistonda faoliyat yuritmoqda.

Shuningdek, mamlakatlarimiz aholisi o'rtasidagi o'zaro bordi-keldi munosabatlari sezilardi tarzda yuksalib bormoqda. Men, ayniqsa, turizm, ilm-fan, ta'lim va boshqa yo'nalishlardagi rishtalar faollashayotganiga e'tibor qaratmoqchiman.

Universitetimiz talabalari boshqa chet tillari qatori o'zbek tilini ham o'rganish imkoniyatiga ega. To'rt yillik o'quv kurslaridan keyin biz ularga diplom va sertifikatlar topshiramiz.

Men 2004-yildan beri universitetimizda talabalarga o'zbek tilidan saboq berib kelayotganimdan mamnunman. Bundan tashqari bir nechta darslik yozish va lug'atlar tuzishga ham erishdim.

Universitetimiz Alisher Navoiy nomidagi Toshkent davlat o'zbek tili va adabiyoti universiteti, Toshkent davlat sharqshunoslik universiteti, Toshkent sharqshunoslik ilmiy-tadqiqot instituti bilan hamkorlik aloqalarini yo'lga qo'ygan va tegishli memorandumlar imzolagan.

Yaqinda professor Nishot Manzar O'zbekistonda ilmiy safarda bo'lib qaytdi. Ushbu tarixchi olimimiz o'rta asrlarda yashab o'tgan mashhur mutafakkir Abdurazzoq Samarqandiy ilmiy merosini o'rganish bo'yicha yetakchi mutaxassislardan biri hisoblanadi.

Bugungi kunda biz universitetimizda bakalavriat dasturiga o'zbek tili, adabiyoti va madaniyati bo'yicha mutaxassislikni kiritishga tayyorgarlik ko'rayapmiz. Shuningdek, Samarqand va Buxoro shaharlari hamda Farg'ona vodiysida joylashgan oliy bilim yurtlari bilan hamkorlik aloqalarini o'rnatish niyatidamiz. Chunki bunday sheriklik munosabatlarining yuksak ahamiyatini yaxshi anglaymiz.

Fursatdan foydalanib, O'zbekistondagi barcha ustozlarim va do'stlarimni Mustaqillik bayrami bilan yana bir bor qutlayman!

Teglar:

0 Izoh

Izoh qoldiring