Milliy madaniy markazlar pavilonida davlat mustaqilligining 34 yilligiga bag‘ishlangan umummilliy birdamlik festivali bo‘lib o‘tdi. Tadbirda turli millatlar vakillarining madaniy merosi, milliy qo‘shiq va raqslari namoyish etildi, faol ishtirokchilar rag‘batlantirildi.

Festival O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mita tashabbusi bilan “Vatan uchun, millat uchun, xalq uchun!” shiori ostida tashkil etildi. Unda qo‘mita rahbariyati bilan birga O‘zbekiston “Adolat” sotsial-demokratik partiyasi, Respublika ma’naviyat va ma’rifat markazi, shuningdek, milliy madaniy markazlar faollari ishtirok etdilar.

Tadbirda qo‘mita raisi Qahramon Sariyev, Respublika ma’naviyat va ma’rifat markazi rahbari Otabek Hasanov hamda Tojikiston Respublikasining O‘zbekistondagi Favqulodda va Muxtor elchisi Abdujabbor Rahmonzoda nutq so‘zlab, mustaqillikning tarixiy ahamiyati va uning yurtimizda tinchlik, barqarorlik hamda millatlararo totuvlikka zamin yaratganini alohida ta’kidladilar.

Festival doirasida mehmonlar milliy madaniy markazlar ko‘rgazmalari bilan tanishdilar, keyin esa san’at ustalari hamda turli millatlarning badiiy jamoalari konsert dasturini taqdim etdilar. Tadbirda kuy-qo‘shiqlar, raqslar va samimiy muloqotlar orqali do‘stlik va birdamlik kayfiyati yaqqol namoyon bo‘ldi.

Ta’kidlash joizki, yaqinda foydalanishga topshirilgan milliy madaniy markazlar paviloni mamlakatimizda olib borilayotgan millatlararo hamjihatlik va do‘stlik siyosatidagi muhim qadam bo‘lib, u turli madaniy qadriyatlarni birlashtiruvchi maydon vazifasini bajarmoqda.