O'zbekiston tashqi ishlar vaziri Baxtiyor Saidov bugun BMTning bolalar jamg'armasi (YUNICEF) Ijrochi direktori Ketrin Meri Rassell bilan uchrashdi.

"BMTning bolalar jamg'armasi (YUNICEF) Ijrochi direktori Ketrin Meri Rassell xonim bilan uchrashishdan mamnunmiz, – deb yozdi O'zbekiston TIV rahbari o'zining telegram-kanalida. – O'zbekiston hukumati uchun mamlakatimiz va butun dunyo bo'ylab kelajak avlodlar farovonligi uchun eng yaxshi sharoitlarni yaratish ustuvor vazifa bo'lib qolmoqda.

Bugungi uchrashuvimizda biz mintaqadagi millionlab bolalar uchun yorqin kelajak yaratishga qaratilgan muhim loyihalarni birgalikda amalga oshirish yuzasidan keng fikr almashdik. YUNICEF bilan yaqin hamkorlikni yuqori qadrlaymiz va Jamg'arma faoliyatini to'liq qo'llab-quvvatlashni davom ettiramiz".