Dunyodagi eng yirik innovatsion megapolislardan biri – Xitoyning Shanxay shahrida O'zbekiston raqamli texnologiyalar markazining tantanali ochilishi bo'lib o'tdi.

O'zbekiston raqamli texnologiyalar markazining ochilishi raqamlashtirish, yuqori texnologiyalar va innovatsion rivojlanish sohasidagi O'zbekiston-Xitoy hamkorligini mustahkamlashda muhim qadam bo'ldi.

Markaz O'zbekiston Raqamli texnologiyalar vazirligi tashabbusi bilan Xitoyning "Shanghai Oriental Credits" kompaniyasi bilan hamkorlikda tashkil etilgan. Loyiha axborot texnologiyalari sohasidagi kompaniyalar, investorlar, ekspertlar hamda O'zbekiston va Xitoyning ilmiy va ta'lim muassasalari o'rtasida to'g'ridan-to'g'ri hamkorlikni rivojlantirishga qaratilgan.

Ochilish marosimida O'zbekiston raqamli texnologiyalar vaziri Sherzod Shermatov boshchiligidagi O'zbekiston delegatsiyasi, shuningdek, ikki mamlakat biznes va texnologik hamjamiyatlari vakillari ishtirok etdi.

Vazir Sherzod Shermatov o'z nutqida, Markazning ochilishi O'zbekistonning global texnologik jarayonlarga xalqaro integratsiyalashuvi bo'yicha chuqur o'ylangan yo'nalishni aks ettirishini ta'kidladi. U bugungi kunda raqamli transformatsiya milliy rivojlanish strategiyasining ajralmas qismi ekanligini va respublika mintaqada raqamli hamkorlikning yangi arxitekturasini shakllantirishda faol ishtirok etish niyatida ekanini ham qayd etdi. Markazning Shanxayda tashkil etilishi nafaqat O'zbekistonning texnologik salohiyatini namoyish etadi, balki xitoylik hamkorlar bilan amaliy hamkorlikni kengaytirish uchun mustahkam zamin yaratadi.

Muassasa O'zbekistonning texnologik salohiyatini ilgari surish, axborot texnologiyalari sohasida eksportga yo'naltirilgan kompaniyalarni qo'llab-quvvatlash, venchur va to'g'ridan-to'g'ri investitsiyalarni jalb qilish, qo'shma ilmiy va ta'lim loyihalarini amalga oshirishga qaratilgan ko'p funksiyali platformaga aylanadi. Unda ekspert uchrashuvlari, startap taqdimotlari, o'quv dasturlari va ikki davlatning raqamli ekotizimlari o'rtasida tajriba almashish uchun tadbirlar o'tkaziladi.

"Shanghai Oriental Credits"  kompaniyasi prezidenti Xu Chuan Xua o'z navbatida markaz ishbilarmonlik aloqalarini rivojlantirish, sarmoya jalb etish, ilg'or bilim va texnologik yechimlar almashishga xizmat qilishini ta'kidladi. Bu O'zbekiston va Xitoy o'rtasidagi keng qamrovli strategik sheriklik doirasida yangi o'sish nuqtasi bo'lishi kutilmoqda. Uning aytishicha, kompaniya O'zbekistonga Markaziy Osiyodagi eng istiqbolli hamkorlardan biri sifatida qaraydi va mamlakat raqamli iqtisodiyotining muhim sohalarida o'z ishtirokini kengaytirish niyatida.

Shanxayda O'zbekiston raqamli texnologiyalar markazining tashkil etilishi innovatsiyalar, texnologiyalar va raqamlashtirish markaziy o'rinni egallagan O'zbekiston va Xitoy o'rtasidagi har tomonlama strategik sheriklikni chuqurlashtirish yo'lidagi yo'nalishning mantiqiy davomi bo'ldi. Bu ham ikki davlat rahbarlarining keyingi yillardagi uchrashuvlari yakunlari bo'yicha erishilgan kelishuvlarni hayotga tatbiq etish yo'lidagi yana bir amaliy qadamdir.